Tarsan oo Xasan Sheekh ku eedeeyay inuu u diiday Aqalka hoose
-
- Posted On 19-11-2016, 10:59AM
Gudoomiyihii hore ee gobolka Banaadir, ahna Musharax Madaxweyne Doorashada 2016 ayaa sheegay in laga hor-istaagay inuu u tartamo Kursiga Aqalka hoose ee Baarlamaanka Federaalka Soomaaliya.
Maxa'uud Axmed Nuur (Tarsan), ayaa Boggiisa Twitter-ka ku sheegay in tartanka Xildhibaanimo loo diiday kadib markii Madaxweynaha Waqtiga ka dhaammaday Xasan Sheekh Maxa'uud uu siiyay Ugaaska Beeshiisa lacag aad u badan, sida uu hadalka u dhigay.
Tarsan wuxuu ku eedeeyay MD Xasan Sheekh inuu musuq-maasuq ku samayanayo Odyaasha dhaqanka iyo Ergada Doorashada Aqalka hoose, si uu ugu guuleysto Doorashada dadban ee soo socoto.
"Xasan Sheekh ma uusan Musuq-maasuqin oo kaliya Nidaamka Siyaasadda dalka, ee wuxuu sidoo kale musuq-maasuqay Odiyaasha Dhaqanka, Ergada Doorashada iyo Masiirka Umada Soomaaliyeed," ayuu yiri Tarsan.
Gudoomiyihii hore ee Gobolka Banaadir ayaa wuxuu ku tilmaamay Doorashada aqalka hoose, mid u afduuban Xasan Sheekh, islamarkaana qof aan isaga la dhinac ahayn uusan u tartami karin Kursiga Xildhibaanimo.
Tarsan hadalkiisa ayaa kusoo beegmayo xilli ay jiraan Cawashooyin badan oo ku aadan Musuq-maasuq lagu samaynayo Doorashada Aqalka hoose, taasoo Villa Somalia lacag badan ku bixinayso si ay u guuleystaan Siyaasiyiinta ku dhaw Xasan Sheekh.
Doorashooyinkii ka dhacay maalmihii lasoo dhaafay Cadaado iyo Jowhar waxaa kusoo baxay Rag ay xulufo yihiin Xasan Sheekh Maxa'uud, kuwaasi oo ay kamid yihiin Faarax Cabdulqaadir, Odowaa, iyo Sanbaloolshe.
GAROWEONLINE
