Telefishinka SNTV oo xayiraaddii laga qaadey
-
- Posted On 19-05-2015, 01:23PM
May 19, 2015 (GO)- Puntland ayaa xayiraaddii ka qaaddey xafiisyada Telefishinka SNTV oo maanta muddo kooban shaqada laga joojiyey.
Wasiir Ku-xigeenka Arrimaha Gudaha Puntland Cabdullaahi Qoob-deero oo isagu soo saarey amarka shaqada looga joojiyey TV-ga ayaa idaacadda VOA u sheegay in SNTV laga qaadey xayiraadda kadib markii maamulkiisu la soo xiriireen dowladda, raalli gelinna ka bixiyeen khaladkii ay galeen. Akhriso sababta loo xirey SNTV
Qoob-deero ayaa sidoo kale sheegay in isla maanta uu la kulmey qaar kamid ah wariyeyaasha ka hawlgala gobolka Bari, kuwaasoo ka codsadey dowladda in telefishinka la fasaxo maadaama wariyihii warka direy uu khaladkiisa qaatey raalli gelinna ka bixiyey.
Ma ahan markii ugu horreysey ee Puntland shaqada ka joojiso mid kamid ah telefishinada Soomaalida. Horay waxaa muddo kooban Puntland shaqada uga joojisey telefishinada Universal iyo Somali Channel.
GAROWE ONLINE
