Tirada dhimashada Qaraxa Muqdishu oo korodhay
-
- Posted On 12-12-2016, 03:19AM
MUQDISHU, Somalia- Faah faahin dheeraad ah oo kasoo baxay Qarax khasaaro gaystay oo maanta 11December, 2016 ka dhacay magaalada Muqdishu, ayaa sheegaysa in tirada dhimashada iyo dhaawacu korodhay iyadoo waxyeellada ugu badan soo gaartay dad shacab ah.
Cusbitalka Madiina ee magaalada Muqdishu, ayaa la dhigay maydka 21 ruux iyo dhaawaca 28 qof oo kusoo waxyeelloobay qarax ka dhacay afaafka hore ee dekedda magaalada Muqdishu.
Tirada guud ee dhimashada weerarkaas ayaa lagu sheegay 25 qof iyo dhaawaca 40 kale.
Ururka Al Shabaab oo ka dambeeyay Qaraxan, ayaa barahooda Internetka ku baahiyay in weerarka ku dileen 30 qof.
Goor sii horaysay mar Afhayeenka gobolka Banaadir, Cabdifataax Cumar Xalane uu la hadlay warbaahinta wuxuu sheegay in weerarkaasi waxyeello kasoo gaartay dad maato aan waxbo galabsan, isagoo intaas ku daray in qaraxaasi aysan ku dhiman Askar katirsan ciidankooda.
Madaxweynaha Somalia ee waqtigu ka dhammaaday Xasan Sheekh Maxamud, ayaa weerarkan cambaareeyay isagoo shacabka iyo ciidanka amniga ugu baaqay inay ka shaqeeyaan sidii looga hortagi lahaa, wuxuu ugu yeeray "kooxaha sida gaarka ah u bartilmaameedsada goobaha shacabka".
Amniga magaalada Muqdishu ayaa faraha ka baxay, waxaana mallayshiyada Shabaab weerarkan kusoo aadisay xilli la sheegay in bishan dhammaadkeeda is-badal dalka ka dhici doono.
GAROWEONLINE
