Ururka Ahlusunna oo DF ku eedeeyey colaadda ka aloosan Galguduud
-
- Posted On 28-02-2015, 07:10AM
February 28, 2015 (GO)- Ururka Ahlu Sunna oo ka arrimiya qaybo kamid ah gobollada dhexe ee dalka ayaa eedeyn kulul u jeediyey dowladda Federaalka Soomaaliya.
Af-hayeen u hadlay ururkaas oo lagu magacaabo Sheekh Cabdullaahi Sheekh Cabdiraxmaan ayaa sheegay in Dowladda Federaalku mas'uul ka tahay dagaallada khasaaraha badan dhaliyey ee bilihii u dambeeyey Ahlu Sunna iyo ciidamada dowladda ku dhex marayey deegaano ka tirsan gobolka Galguduud.
Af-hayeenku wuxuu intaas ku daray in Dowladda Federaalku dagaalkii ay kula jirtey Al-shabaab usoo weecisey dhanka Ahlu Sunna, waa sida uu hadalka u dhigaye.
"xamaasadda qaar ka mid ah madaxda dowladda Soomaaliya u hayaan la dagaalanka Ahlusunna uma hayaan Al-shabaab...Madaxda dowladdu haddii ay u arkaan Al-shabaab walaalo fududaaday anagu waxaan u aragnaa inay yihiin cadow" ayuu yiri.
Mileeshiyaadka Ahlu Sunna iyo ciidamada dowladda ayaa todobaadyadii u dambeeyey dhowr mar ku dagaalamay degmada Guriceel ee gobolka Galguduud.
GAROWE ONLINE
