Villa Soomaaliya oo ku hungowdey damaceeda shirka maamulada
-
WARIYAHA MUQDISHO GAROWE ONLINE
- Posted On 12-09-2022, 04:19AM
MUQDISHO, Soomaaliya - Garowe Online ayaa fahansan in wafdiga madaxwayne Hassan Sheikh Mohamud ee ka qeybgalaya caleema-saarka hogaamiyaha la doortey ee Kenya William Samoei Ruto uu ka kooban yahay 25 xubnood oo ay ku jiraan wasiiro, xildhibaano, mas'uuliyiin kale oo kamid ah dowladda federaalka iyo ilaaladda gaarka ah.
Munaasabada dhaarinta ayaa Nairobi ka dhacaysa 13-ka bishan September.
Dhanka kale, Shirkii madaxda maamulada iyo dowlada Federaalka u dhexeeyey ayaa weli ka socda Muqdisho iyadoo wararka GO helayo sheegayaan in maanta galinka hore soo dhamaanayo.
Kulankaan ayaa, sida xogto sheegeyso, aan lagu furin qodobo badan maadaama waqtigu kooban yahay.
Madaxda maamulada qaarkood ayaa qaba in waqti kale la isugu yimaado kulankaan maadaama madaxweynaha Puntland maqan yahay, halka madaxweyne Hassan Sheikh Mohamud uusan waqti badan haysan oo uu dalka Kenya u dhoofayo maalinta berri ah Sept.12.
Villa Somalia ayaa u hamuun qabtey in ay hesho sawir muujinaya madaxda maamulada iyo Madaxweynaha Soomaaliya oo wada fadhiya inta ka horeysa safarka Xasan Sheekh ku tagayo dalka Mareykanka gaar ahaan magaalooyinka Washington iyo New York.
GAROWE ONLINE
