Wasaaradda Caafimaadka Somalia oo ballan-qaad u samaysay dhawacyada qaraxii SYL
-
- Posted On 31-08-2016, 09:18AM
MUQDISHU, Somalia- Waxaa magaalada Muqdishu caasumadda Somalia ka socda qorshe loogu gurmanayo dadkii ku waxyeelloobay qaraxyadii ka dhacay shalay hotel SYL, waxaana iminka lala tacaalayaa dadkii ku dhaawacmay qaraxii loo adeegsaday baabuurka.
Wasaaradda Caafimaadka Somalia ayaa ballan qaaday inay wax u qaban doonto dadka xaaladoodu liidato, waxayna mahad celin u jeedisay dhaqaatiirtii isku howlay sidii ay bulshada ugu shaqayn lahaayeen gaar ahaan xilliyada dhibaatadu dhacdo.
Wasiirka wasaaradda caafimaadka xukuumadda Somalia Maxamed Xaaji Cabdinuur (Madeer), ayaa warbaahinta u sheegay in dadka qaba dhaawacyada culus loo qaadi doono dalka dibadiisa in kastoo uusan sheegin halka la gayn doono.
Madeer ayaa xusay in wasaaraddu dadaal u gali doonto qof kasta oo dhibaato kasoo gaarto qaraxyada ay waddaan mallayshiyaadka Al Shabaab isagoo bulshada ugu baaqay in la taakuleeyo kooda dhibaataysan.
Xaaladda bukaanadda ku waxyeelloobay qaraxaasi ayaa kasoo kabanaya halka kuwa kale arrintooda caafimaad aad u liidato.
Waxaa xusid mudan in dhowr jeer oo hore dowladda Somalia ballan qaad u samaysay dad ku dhaawacmay qaraxyo ka dhacay magaalada Muqdishu kuwaasoo ilaa hadda aysan waxba ka hirgalin.
GAROWEONLINE
