Wasiirkii Wershedaha Somaliland oo is casiley
-
- Posted On 03-03-2015, 05:43PM
March 3, 2015 (GO)- Wasiirkii Warshadaha Somaliland Abiib Diiriye Nuur ayaa shegay inuu xilkaas iska casiley.
Waa mas'uulkii afraad ee is-casila kaddib isku-shaandheyn Feb 28, 2015 Madaxweynaha Somaliland Axmed Maxamed Maxamuud Siilaanyo ku sameeyey golaha wasiirrada, taliska ciidamada iyo qaar kamid ah agaasimeyaasha hay'adda dowladda hoos taga.
Abiib oo la weydiiyey sababta uu xilka loo soo magacaabey isaga cisiley wuxuu sheegay inuu saluugey qaabka wax u socdaan iyo weliba habka isku-shaandheyntu u dhacdey.
Wuxuu sidoo kale xusey in isku-shaandheyntu ahayn mid si miisaaman looga shaqeeyey islamarkaana u daneynaysa dadka iyo dowladda Somaliland, waa sida uu hadalka u dhigaye.
"markaan arkay jewigu sida uu yahay iyo nidaam darrada jirta iyo in wax walba si khaldan u socdaan ayaan go'aankan gaarey" ayuu yiri.
Horay waxaa isu casiley Wasiirkii Maaliyadda, Agaasimihii Wasaaradda Arrimaha Dibadda iyo la-taliyihii Madaxweyne Siilaanyo ee arrimaha dadka la hayb sooco.
GAROWE ONLINE
