Xasan Sheekh oo hal arrin u xaqiijiyey saraakiisha ciidamadda

Madaxweynaha cusub ee Soomaaliya ayaa maanta kormeer ku tagay xarunta Wasaaradda Gaashaandhigga.

MUQDISHO, Soomaaliya - Madaxweynaha cusub ee Soomaaliya, Xasan Sheekh Maxamuud, ayaa maanta kormeer shaqo oo lama filaan ah ku tagay xarunta Wasaaradda Gaashaandhigga.

Sida laga soo xigtay Villa Soomaaliya, Xasan ayaa tilmaamay in dowladdu ay xoogga saari doonto howlgallada dalka looga xoreynayo kooxda argagixisada ah ee Al -Shabaab.

Madaxweynaha oo ugu horreyn salaan sharaf ka qaatay cutubyo ka tirsan ciidanka Xoogga Dalka Soomaaliyeed ayaa waxa uu kormeeray Xafiisyada ay ku shaqeeyaan talisyada kala duwan ee Wasaaradda Gaashaandhigga, isaga oo warbixinno ka dhageystay hoggaannada Ciidamada Xoogga Dalka.

Qalabka isgaarsiinta Xoogga Dalka ayuu kula xiriiray qaar ka mid ah saraakiisha iyo ciidamada Soomaaliyeed ee ku sugan jiidaha dagaalka ka dhanka ah argagixisada Al-Shabaab.

Sida naf-hurninada leh ee ay dharaar iyo habeen walba heegan ugu yihiin difaaca dadkooda iyo dalkooda ayuu bogaadiyey. Sidoo kale madaxweynuhu waxa uu la wadaagay ciidamada sida ay dowladda uga go’an tahay xaqiijinta amniga guud ee dalka.

Madaxweyne Xasan Sheekh Maxamuud oo kormeerkiisii ugu horreeyey ku tagay Wasaaradda Gaashaandhigga kaddib dib u doorashadiisa ayaa u kuur galay xaaladda Ciidamada Qalabka Sida, waxaa uuna muujiyey sida ay dowladda Federaalka uga go’an tahay xaqiijinta amniga guud ee dalka.

GAROWE ONLINE