​Xasan Sheekh oo muddo xileedkii ka dhammaaday

MUQDISHU, Somalia- Madaxweynaha dowladda Federalka Somalia Xasan Sheekh ayaa maanta ugu egtahay muddo xileedkiisii dhammaa Afarta Sano ee uu joogay xarunta looga taliyo waddanka ee Villa Somalia.

Xasan Sheekh ayaa Afar sano kahor maantoo kale lagu doortay magaalada Muqdishu (10 September, 2012), isagoo waqtigaasi ku cusbaa saaxadda siyaasadda, balse lagu yaqaanay arrimaha bulshada gaar ahaan dhanka waxbarashada.

Wuxuu ka guulaystay wareegii ugu dambeeyay Sheekh Shariif Sheekh Axmed oo markaas soo hogaamiyay dowladdii KMG ahayd.

Xasan oo la kulmay nasiib wanaag dowlad caalamku aqoonsanyahay iyo taageero dhinac walbo looga hayay ayaa dadka siyaasadda odorosa sheegayaan inuusan waxqabadkii laga sugayay waddanka gaarsiin, isagoo lagu dhaliilay hogaan jilicsan iyo ka go'aan qaadasha hal koox oo ka agdhow madaxtooyada.

Mudadii uu waddanka joogay Xasan Sheekh, waxaa muuqatay inaysan jirin waxqabad la taaban karo, hase ahaatee waxaa dalka ka hirgalay nidaamka Federalka oo buuq badan dhaliyay kaasoo qalalaasaha ugu badan ka imaanay xarunta madaxtooyada islamarkaana aan la dhammaystirin.

Waxaa dhismay maamullada Jubbaland, Galmudug iyo Koonfur Galbeed, waxaana la xasuustaa sidii loogu murmay iyadoo xitaa la gaaray in maamulladaasi mid kamid ah{Jubbaland} mooshin Barlamanka Somalia ka keeno.

Khilaafaadka u dhaxeeyay maamulka Puntland iyo dowladda Federalka ayaa xoogaystay taasoo marar badan kaliftay inay xukuumadda Somalia xiriirka loo jaro kadib markii ay fuli waayeen ballanqaadyo la galay.

Deeqo badan iyo tageero laxaad leh ayaa beesha caalamku waddanka lagarab taagnayd hase ahaatee masoo dhaafin xarunta madaxtooyada iyo magaalada Muqdishu iyadoo dad xog-xogaal ah sheegayaa inaan dhammaantood sidii loogu talo galay loo hirgalin.

Hadii mid kamid ah laga xuso waxaa ugu muhiimsanaa Barnaamijkii loogu talo galay in dhallaanka Somaliyeed wax lagu baro ee {Aada Dugsiyada}, ee uu  taageerayay Midowga Yurub kaasoo la qorsheeynayay in waddanka oo dhan laga hirgalo, nasiib darro waxaase uu noqday mid aan soo dhaafin caasumadda Somalia, taasoo xitaa macallimiintii Barnaamijkaas lagu shaqaalaysiiyay ay dhawaan ka cabanayeen xuquuq ka maqan.

Mudadii uu xilka hayay madaxweynaha Somalia, waxaa sidoo kale qaraxyo iyo weeraro xooggan kooxda Al Shabaab ka gaysteen qaybo kamid ah waddanka iyadoo sidoo kale jireen howgallo ka dhan ahaa ururkaasi oo dalka ka fulay.

Waxaase xusid mudan in kooxdu wali khatar ku tahay dowladda iyo dalka intaba iyagoo weeraro joogto ah ka fuliya magaalada Muqdishu kuwaasoo qaybo kamid ah lala eegtay Villa Somalia.

Madaxweyne Xasan Sheekh mudadii uu talada dalka hayay, wuxuu safaro joogta ah ku tagay qaybo kamid ah waddamada caalamka isagoo lasoo yeeshay shirar badan iyo kulamo xad dhaaf ahaa, ilaa haddana ma jirto wax ka hirgalay hishiisyo la galay iyo ballanqaadyo la sameeyay.

Waxaa sidoo kale xusid mudnaa in doodo ka dhasheen lahaanshaha qaybo kamid ah Bariga iyo Badda Somalia kuwaaso ka imaanayay dowladda Kenya, waxaana muuqatay inay arrimahaasi ka dambeeyeen hishiisyo qarsoodi ahaa oo dowladdu la gashay Kenya.

Hadaba iyadoo waxyaabihii dhacay Afartaas sano aan qoraal lagusoo koobi karin ayaa hadana, waxaa muuqata in Madaxweyne Xasan Sheekh ku fashilmay dhammaan ballanqaadkii uu layimid xilligii uu murashaxa ahaa, wuxuu haatan u taagan yahay jagada uu hadda hayay Afarta sano ee soo socota.

GAROWEONLINE