Xildhibaan lagu dhaawacay Muqdisho iyo xildhibaan hore oo la diley
-
- Posted On 04-12-2014, 11:40AM
December 4, 2014 (GO)- Weerar barqanimadii maanta ka dhacay degmada Xamar Weyne ee magaalada Muqdisho ayaa lagu diley mas'uul horay uga tirsanaan jirey baarlamaanka Federaalka oo lagu magacaabi jirey Liibaan Cabdulaahi Nuur islamarkaana lagu dhaawacay xildhibaan kamid ah baarlamaanka hadda oo isagana lagu magacaabo Mayow Mustaf.
Weerarka waxaa fuliyey dabley hubeysan oo watey gaari yar kuwaas oo durbadiiba goobta ka baxsaday. Rasaas qaddar kooban socotey ayaa dhex martay kooxdii weerarka geysatay iyo ciidamo ka tirsan kuwa nabad-sugidda oo baacsaday.
Afar kamid ah ciidamada nabad-sugidda ayaa lagu soo waramayaa inay iska hor imaadkaas ku dhaawacmeen iyadoon lagu guuleysan in gacanta lagu soo dhigo kooxdii weerarka geysatay.
Dhanka kale af-hayeenka hawgallada Al-shabaab Cabdicasiis Abu Muscab oo la hadlay wakaaladda wararka ee AFP ayaa sheegay in weerarkaas ay iyagu ka dambeeyeen.
Weerarka ayaa dhacay waxyar kadib markii ay Muqdisho soo gaareen wafdi ka socda Jaamacadda Carabta.
Al-shabaab ayaa saddexdii todobaad ee ugu dambeeyey kordhisey qaraxyada iyo weerarrada tooska ah ee Muqdisho ka geysanayo.
Afar qof ayaa ku dhintay ku dhowaad toban kalena way ku dhaawacmeen qarax ismiidaamin ahaa oo Al-shabaab shalay la beegsatay kolonyo ka tirsan gaadiidka Qaramada Midoobay oo marayey meel u dhow garoonka diyaaradaha ee magaalada Muqdisho.
GAROWE ONLINE
