Xildhibaan lagu diley Muqdisho, Ra'isal wasaaraha oo tacsi direy
-
- Posted On 25-07-2015, 04:25PM
July 24,2015 (GO)- Degmada Wadajir ee magaalada Muqdisho ayaa galabta lagu dilay xildhibaan ka tirsan Baarlamanka Soomaliya.
Xildhibaanka oo lagu magacaabo Cabdulaahi Xuseen Maxamud ayaa wararku sheegayan inuu geeriyooday kadib markii dabley hubeysan toogteen islamarkaana ka baxsadeen goobta.
Cabdulahi Xuseen Maxamud oo dhowaan lagu bedelay aabihii Xuseen Baantuu kadib markii uu u geeryoodey xanuun bishii April ee sanadkan.
Goob joogayaal ayaa sheegaya ciidamada ammaanka mar danbe meesha soo gaareen kuwasoo bilaabay howl galo lagu raadinayo kooxda dilka gaysatay.
Dhinaca kale Ra'isal wasaaraha Somalia Cumar Cabdirashid ayaa tacsi u direy qoyska marxuum Saciid Cali Saalax oo maanta dabley hubeysan ku dishey xaafada Dharkeynley ee magaalada Muqdisho.
“Innaa lilaahi wa innaa ileyhi raajicuun, anigoo ku hadlaya magacayga iyo kan xukuumadda Soomaaliya, waxaan alle uga baryeynaa Saciid Cali Saalax oo kamid ahaa shaqaalaha Xafiiska oo saakay la dilay in uu Eebe naxariistiisa Janno ka waraabiyo, marxuum Siciid wuxuu ahaa wadani jecel nabada iyo horumarka dalka, mudana kasoo shaqaynayay xafiiska Ra’iisul Wasaaraha, waxaana halkaan tacsi tiiraanyo leh uga dirayaa qoyskii, eheladii, asxaabtii, marxuumka iyo dhamaan shacabka Soomaaliyeed” ayuu yiri Ra’iisul Wasaare Cumar.
Dilka Xildhibaanka iyo sarkaalka ka tirsan xafiiska Ra'isal wasaaraha Somalia ayaa kusoo beegmaya asbuucyo kadib markii ay hakad galeen weerarada ururka Al-shabaab u gaysanayeen saraakiisha dowlada iyo goobaha la isugu yimaado magalaada Muqdisho.
GAROWEONLINE
