Xildhibaanadii ugu horeeyay ee Gollaha Shacabka oo la doortay
-
Garowe Online
- Posted On 01-11-2021, 08:24AM
MUQDISHO, Soomaaliya - Labo Xildhibaan ayaa Maanta lagu doortay Muqdisho, iyagoo noqday kuwii ugu horeeyay oo loo doortay Gollaha Shacabka, ee Baarlamaanka 11aad.
Mahdi Guuleed, oo ah Ra'iisul Wasaare ku-xigeenka dalka ayaa ku guuleystay kursiga ugu horeeya, isagoo helay codad badan oo gaaraya 97, halka Gabar la tartamaysay oo lagu magacaabo Mushtaaq Ibraahim oo heshay 3 cod.
Kursiga 2aad waxaa kusoo baxay Biixi Iimaan Cige, oo horey Xildhibaan u ahaa, waxaana uu helay wareegga 1aad 91 cod, halka ninkii la tartamayay C/raxmaan Xasan Ismaaciil, oo helay 9 cod.
Min hal cod ayaa hallaabey labada kursiga doorashadooda, waxaana halkaasi lagu soo gaba-gabeeyay doorashadii Maanta ka dhacaysay Dugsiga Tababarka Booliska Jeneraal Kaahiye, ee magaaladda Muqdisho.
Doorashadda maanta dhacday ayaa daah-fur u ah codeynta Kuraasta Gollaha Shacabka oo mudo saddex jeer ah dib u dhacday, waxaana wali jira caqabado maamulada qaar ay qabaan, sida HirShabeelle, Jubbaland iyo Koonfur Galbeed.
GAROWE ONLINE
