Wasiirka Arrimaha Dibadda Malawi oo safar ku tagey Somaliland

HARGEYSA, Somaliland - Waxaa maanta oo Sabti ah magaaladda Hargeysa gaarey wafdi uu hogaaminayo Wasiirka Arrimaha Dibadda wadanka Malawi, Eisenhower Mkaka.

Lama oga ujeedka socdaalka Wasiirka, iyadoo aan jirin wax war ah oo kasoo baxay Somaliland oo ku aadan booqashadda, taasoo kusoo beegmaysa xili dhawaan Uhuru Nairobi heshiis kula galay Muuse Biixi.

Heshiiska ayaa ku saabsan inay Kenya Qunsuliyad ka furato Hargeysa, halka Somaliland xafiiska ay ku leedahay Nairobi loo bedelayo Qunsuliyad, waxaana tallaabadan ka careysiisay dowladda Soomaaliya.

Horey Jabuuti iyo Itoobiya ayaa qunsuliyado uga furtay Hargeysa, iyadoo hadda Kenya kusoo biirtay, waxaana la ogeyn in Malawi ay doonayso tallaabadaas oo kale inay qaado.

Waxay dowladda Soomaaliya xiriirka ugu jartay Kenya iyo  Gini (Guinea) kadib markii ay maamuus Madaxweyne dal madaxbanaan ugu sameeyeen caasimadahooda.

GAROWE ONLINE