Soomaliya: Qarax xooggan oo ka dhacay Muqdisho
-
- Posted On 14-10-2017, 03:42PM
MUQDISHO, Soomaliya- Qarax aad u xoog badan ayaa hadda ka dhacay magaalada Muqdisho ee caasumadda Soomaaliya gaar ahaan nawaaxiga wadada mashquulka badan ee Maka Al Mukarama.
Wararka ayaa sheegaya in gaari ay leeyihiin ciidamada dowladda uu ku qarxay nawaaxiga isgoyska Soobe ee KM5.
Lama oga cidda bartilmaameedku ahaa iyo khasaaraha rasmiga ah ee ka dhashay, balse warar hordhac ah ayaa sheegaya inay ugu yaraan 10 qof ay dhinteen.
Weerarkan ayaa loo malaynayaa inay ka dambayso kooxda Al Shabaab, waxaana jugtiisa laga maqlay dhammaan caasumadda Soomaaliya.
Muuqaalo laga duubay nawaaxiga halka qaraxu ka dhacay ayaa muujinaya qiiq xirka isku shareeray.
Ciidamada Ammaanka ayaa goobta gaaraya, waxaana daqiiqadaha soo socda la ogaan doonaa khasaaraha.
Tallaabadan ayaa timid xilli ay is-casileen taliyihii ciidamada xoogga dalka iyo wasiirkii Gaashaandhiga, sidoo kale maanta Al Shabaab ay la wareegtay deegaanka Bariire.
Muqdisho oo tan iyo bur-burkii Soomaliya hoy u ahayd qaraxyo iyo dagaallo ayaa muddooyinkii dambe laga dareemay xasilooni.
Faah faahinta warkaan dib ayaan idiin kasoo gudbin doonaa
GAROWE ONLINE
