Burkina Faso: Kooxo hubeysan oo 20 qof ku dilay xuduuda Togo

AFRICA: Laamaha ammaanka ee dalka Burkina Faso ayaa Isniintii shalay sheegay in 20 qof lagu dilay weerar ay rag hubeysan ka fuliyeen meel u dhow magaalada Beto ee gobolka bartamaha bari ee xuduuda la leh Togo.

Ilo dhanka ammaanka ah oo ku sugan Burkina Faso ayaa sheegay, in weerarka uu ku dhintay 20 qof oo kuwaas oo u badan ganacsato, halka ilo maxalli ah ay sheegeen dhimashada 25 qof.

In ka badan 16,000 oo rayid, askar iyo booliis isugu jiro ayaa lagu dilay weeraro ay geysteen kooxo hubeysan, in ka badan 5,000 oo ka mid ah ayaa la dilay sanadkan, sida lagu sheegay tirakoob ay sameysay hay’ad aan dowli ahayn.

Weerarradan ayaa sidoo kale barakiciyey in ka badan laba milyan oo qof gudaha dalka, taas oo ka dhigeyso mid ka mid ah dhibaatooyinka barakaca ee ugu xun ee Afrika.

Ibrahim Traoré ayaa la wareegay awoodda Burkina Faso Sebtembar 30, 2022, ka dib General Paul Henry Sandaugo Damiba, kaasoo bishii Janaayo ee sanadkaas afgambiyay madaxweynihii ugu dambeeyay ee dalkaasi oo doorasho ku yimid, Rock Mark Christian Kabore.

Hogaamiyayaasha afgambiga ayaa sabab uga dhiga in ay xukunka la wareegeen carada ay ka qabaan guul-darrooyinka ciidamada ammaanku uga yimid xakameeynta fallaagada hubaysan, oo kumanaan qof dilay tan iyo markii ay ka soo galeen xuduudda dalka ay dariska yihiin ee Mali sannadkii 2015-kii.

GAROWE ONLINE