Dagaalka Suudaan oo galay mar-xalad lagu qeexay "cadaab dhab ah"

Loolanka awoodeed ee dilaaga ah ee ka qarxay Sudan 15-kii April ayaa dhaliyay dhibaato bini’aadantinimo oo weyn.

KHARTUUM, Suudaan - Dagaalka Suudaan ayaa xoogeystay kadib markii uu waqtigiisu dhacay heshiiskii xabad joojinta. Isku-dhacii ugu dambeeyay ayaa laga soo wariyey gobolka Darfur ayna ku dhinteen tobanaan qof oo rayid ah.

Qiiq madoow ayaa cirka isku shareeray Axadii kadib markii ay dhamaatay xabad joojintii u dhaxaysay ciidamada Sudan iyo kuwa RSF oo saacado kahor dhacay, sida uu muujinayo muuqaal telefishan toos looga baahiyey telefishinada.

"Koonfurta Khartoum waxaan ku nool nahay cabsi duqeymo rabshado wata, dhawaqa qoryaha lidka diyaaradaha iyo goynta korontada," ayay tiri Sara Hassan oo 34 jir ah oo degan deegaanka. "Waxaan ku jirnaa jahanamo dhab ah".

Dagaallada ka socda caasimadda ayaa sababay burbur iyo dhac baahsan, waxaa dhulka la simay adeegyadii caafimaadka, korontadii iyo biyihii oo go’ay, sahaydii raashinka oo yaraatay.

RSF waxa ay sheegtay in ay soo ridday diyaarad dagaal ka dib markii ay ciidamadu "ku qaadeen weerar cirka ah oo lala beegsadey fariisimaha ciidamadeena" ee waqooyiga Khartoum.

Ilo dhanka militariga ah ayaa sheegay in diyaarad Shiinees ah ay ku burburtay meel u dhow saldhigga Wadi Seidna ee waqooyiga Khartoum sababtoo ah "cilad farsamo".

Loolanka awoodeed ee dilaaga ah ee ka qarxay Sudan 15-kii April ayaa dhaliyay dhibaato bini’aadantinimo oo weyn iyadoo in ka badan 1.2 milyan oo qof ay ku barakaceen gudaha dalka iyo 400,000 oo kale ay u qaxeen dalalka deriska la ah.

GAROWE ONLINE