Haweenaydii u horeysay oo wasiirka difaaca ka noqotay Tanzania
-
WARIYAHA AFRIKA GAROWE ONLINE
- Posted On 13-09-2021, 03:49PM
DARU SALAM, Tanzania - Madaxweynaha Tanzania, Samia Suluhu Hassan, ayaa u magacawday Stergomena Lawrence Tax in ay noqoto wasiirka cusub ee gaashaandhigga iyo adeegga qaranka ee waddankaas.
Elias Kwandikwa, oo dhintay horraantii bishii Ogosto gudaha isbitaal ku yaala Dar es Salaam, ayay badelaysaa. Agaasinka Warfaafinta Madaxtooyada ayaa bayaan ku xaqiijiyey magacaabida.
Dr Tax ayaa noqoneysa haweeneydii ugu horreysay ee jagada wasiirka gaashaandhigga ka qabata tan iyo markii ay xornimada qaadatay waddankan ku yaala bariga qaaradda Afrika.
Sidoo kale, waxay soo noqotay xoghayaha SADC, oo ah urur dowladeed oo la aasaasay 1992 si kor loogu qaado siyaasadda, dhaqan-dhaqaale iyo amniga iskaashiga iyo isdhexgalka 16-ka dal ee xubnaha ka ah.
Muddadii ay xilka haysay oo ahayd xoghayaha fulinta ee SADC waxay dhammaatay 31-kii Ogosto. Waxaa loo magacaabay wasiirka gaashaandhigga laba maalmood kadib markii loo dhaariyay xubinnimada Baarlamaanka.
Madaxweyne Suluhu ayaa sheegtay inay u magacawday Dr Tax si ay u jabiso "xaaraanta ku saabsan in raggu yihiin kuwa u qalma in ay ku fadhiistaan jago kasta oo muhiim ah".
"Shaqada wasiirku ka qabto xafiiskaas ma aha in uu qaato qori ama madaafiic. Waajibka ugu weyn ee saaran ayaa ah in inta badan ay isku dubarido oo maamusho maamulka iyo siyaasadaha wasaaradda," ayay tiri.
Sikastaba ha ahaatee, Stergomena Lawrence Tax ayaa ku timid isbedel lagu sameeyay xubnaha golaha wasiiradda Tanzania, waxaana dhankeeda ay farxad ballaaran ay ka muujisay jagadda cusub ee loo magacaabay.
GAROWE ONLINE
