Japan oo taageertay in Midowga Afrika xubin ka noqdo G-20
-
WARIYAHA ADDIS ABABA GAROWE ONLINE
- Posted On 21-12-2022, 02:30PM
ADDIS ABABA, Ethiopia - Ra'iisul Wasaaraha Japan ayaa taageero u muujiyay Isniintii in Midowga Afrika uu xubin joogto ah ka noqdo G-20, sida ay sheegtay warbaahinta gudaha dalkaas.
"Marka la eego doorka ballaarinta ee dalalka Afrikaanka ah ee beesha caalamka sannadihii la soo dhaafay, Japan waxay aad u dooneysay inay xoojiso xiriirka Afrika," ayay Kyodo News ka soo xigtay Fumio Kishida oo ka hadlayay shir jaraa'id oo ay si wadajir ah u qabteen madaxweynaha Senegal, Macky Sall ee Tokyo.
Sall, oo sidoo kale ah guddoomiyaha Midowga Afrika, ayaa sheegay inuu ku faraxsan yahay soo jeedinta Kishida. Balse, waxa uu rajo ka muujiyey in aduunka isku-raaco.
Labada mas'uul oo wadahadalo toos ah yeeshay ayaa sidoo kale ku heshiiyay inay ka wada shaqeeyaan mashaariicda horumarinta shidaalka iyo gaaska dabiiciga ah ee Senegal.
Hogaamiyaha Japan ayaa ballan qaaday in Tokyo ay bixin doonto ilaa 10 bilyan yen ($ 72.8 milyan) oo deyn dulsaar yar ah oo la siinayo waaxda waxbarashada ee Senegal iyo ilaa 15.42 bilyan yen ($ 112.3 milyan) oo gargaar deeq ah oo loogu talagalay warshadaha kalluumeysiga.
Hadalka Kishida ayaa yimid kadib baaqii madaxweynaha Mareykanka Joe Biden todobaadkii hore ee ahaa in Midowga Afrika uu xubin joogto ah ka noqdo G-20.
"Afrika waxay ka tirsan tahay miiska qol kasta, halkaas oo caqabadaha caalamiga ah looga hadlayo, iyo xarun kasta oo ay ka socdaan doodo wax ku ool u leh horumarka aduunka," ayuu yiri Biden
GAROWE ONLINE
