Soomaali ka tirsanaa booliska keydka Kenya oo la khaarijiyey

Maxamed Maxamed Cabdullaahi ayaa la beegsadey xilli uu kusii jeeday hoygiisa xilli saq dhexe ah.

NAIROBI, Kenya - Booliska Kenya ayaa ugaarsanaya rag hubeysan oo looga shakisan yahay inay ka tirsan yihiin dagaalameyaasha Al Shabaab oo toogasho ku dilay askari ka tirsan ciidanka kaydka qaranka. Falkan ayaa ka dhacay deegaanka Guticha ee Waqooyiga Mandheera.

Meydka Mohamed Mohamed Abdullah oo caan ka ahaa deegaankaas ayaa, sidda ay ku warantey majaladda The Star, waxaa la helay subaxnimadii Isniinta kadib toogashada.

Dadka deegaanka oo ay soo xigatay Jariiradda afka adheer ayaa shaaca ka dhigay in dableyda ay marxuumka kaga daba-tageen gurigiisa oo ay ku toogteen 2-dii saq dhexe.

"Waxay baxsadeen wax yar ka dib dhacdadii 29-kii May, booliisku waxay sheegeen in ay ka shakisan yihiin in lagu raad joogo," ayay raacisay warbixinadda wargeyska.

Booliiska ayaa daqiiqado kadib falka khaarijinta ah soo gaaray goobta ay wax ka dhaceen, waxaana ay sameeyeen baaris ka hor inta aysan qoyska u ogolaan in ay aasaan meydka.

Dhacdadan ayaa noqoneysa tii ugu dambeysay ee deegaankaas ka dhacda iyadoo laga cabsi qabo in Al-Shabaab ay isku dayayaan in ay saldhig ka sameystaan ​​halkaas oo weeraro qorsheysan ay ka geystaan.

1-dii Maajo, lix askari oo booliis ah ayaa ku dhaawacmay ka dib markii gaari ay wateen uu haleelay Walxaha Qarxa ee Rhamu, Mandheera. Saraakiishan ayaa la sheegay in ay wateen gaari rasmi ah oo ku sii jeeday magaalada Mandheera, waxaana ay ku jiireen qarax miino.

GAROWE ONLINE