Madaxa Xiriirka Kubadda Cagta Falastiin oo loo diiday gelitaanka Mareykanka

RAMALLAH – Guddoomiyaha Xiriirka Kubadda Cagta Falastiin, Jibriil Rajoub, ayaa sheegay inuu weli ku sugan yahay magaalada Mexico City, isagoo sugaya oggolaansho uu ku galo Mareykanka si uu uga qeyb galo munaasabadaha Koobka Adduunka ee FIFA 2026.

Rajoub ayaa ka qeyb galay ciyaartii furitaanka Koobka Adduunka ee dhexmartay Mexico iyo Koonfur Afrika, balse wuxuu ka mid yahay dhowr mas’uul oo haysta aqoonsiga FIFA oo loo diiday fiisaha Mareykanka ama weli aan loo soo saarin.

“Ma aaminsani inay caddaalad tahay in la xadido ama laga hor istaago dadka kubadda cagta ku lugta leh ee dunida oo dhan inay ka qeybgalaan munaasabaddan,” ayuu Rajoub ku sheegay wareysi uu siiyay wakaaladda wararka ee AP.

Inkasta oo xulka Falastiin uusan u soo bixin Koobka Adduunka, haddana FIFA ayaa caadiyan ku casuunto madaxda xiriirrada kubadda cagta ee caalamka inay ka qeyb galaan tartanka, iyadoo u aragta munaasabad mideysa bulshada caalamka.

Madaxweynaha FIFA, Gianni Infantino, ayaa horey u sheegay in qof kasta lagu soo dhoweyn doono dalalka martigelinaya tartanka ee Canada, Mexico iyo Mareykanka. Si kastaba ha ahaatee, Mareykanka ayaa diiday gelitaanka qaar ka mid ah martida la casuumay, oo ay ku jiraan garsoore Soomaali ah iyo sawir-qaade la socday xulka Ciraaq.

Infantino ayaa toddobaadkan sheegay in FIFA ay isku dayday inay xaliso dhibaatooyinka la xiriira fiisooyinka, balse aysan awood u lahayn inay ka sarreyso go'aannada ay gaaraan dowladaha.

“Ma nihin boqorrada dunida ee amar ku bixin kara dowladaha iyo hay’adaha ammaanka,” ayuu yiri.

Wasaaradda Arrimaha Dibadda Mareykanka ayaan si degdeg ah uga hadlin sababta Rajoub loogu diiday fiisaha. Dowladda Mareykanka ayaa sanadkii hore adkaysay shuruudaha fiisooyinka ee dadka wata baasaboorrada Falastiin, gaar ahaan kuwa la soo shaqeeyay Maamulka Falastiin.

Rajoub iyo mas’uuliyiin kale oo Falastiiniyiin ah ayaa muddo dheer ku eedeynayay Israa’iil inay ku xadgudubto xeerarka FIFA, iyagoo ku doodaya in kooxaha ka dhisan deegaannada Israa’iil ka degto Daanta Galbeed ay ka ciyaaraan horyaalka Israa’iil. Waxay sidoo kale cambaareeyeen xannibaadaha lagu hayo dhaqdhaqaaqa ciyaartoyda Falastiin iyo burburka baaxadda leh ee dagaalka Qasa uu u geystay xarumaha ciyaaraha.

Bishii hore, Rajoub ayaa diiday inuu gacan qaado madaxa Xiriirka Kubadda Cagta Israa’iil, inkastoo uu codsigaas ka yimid Gianni Infantino, isagoo sheegay in tallaabadaasi aysan bogsiinayn dhaawacyada jira, balse ay indhaha ka qarinayso waxa uu ku tilmaamay falalka Israa’iil.

Rajoub ayaa sidoo kale xusay in markii Ruushka uu martigeliyay Koobkii Adduunka ee 2018, aan la saarin xayiraado la mid ah dadka lagu casuumay tartanka.

GAROWE ONLINE