Falkii Toogashada ee Madxafka Yahuuda ee Washington, D.C. – Faahfaahin Cusub
-
- Posted On 22-05-2025, 09:47AM
Toogasho ka dhacday habeenkii Arbacada ee May 21, 2025, ayaa lagu dilay laba shaqaale oo ka tirsan Safaaradda Israa’iil ee Washington, D.C., kuwaasoo ku sugnaa agagaarka Madxafka Yahuuda ee Washington, D.C. Weerarka ayaa dhacay xilli ay ka soo baxayeen munaasabad loogu talagalay dhallinyarada diblomaasiyiinta ee ay soo qabanqaabisay Guddiga Yuhuudda ee Mareykanka.
Labada la dilay waxaa lagu magacaabi jiray Yaron Lischinsky iyo Sarah Milgrim. Lischinsky wuxuu ahaa muwaadin Israa’iil oo saafaradda Washington katirsanaa, halka Milgrim ay ahayd muwaadin Mareykan ah. Labadooduba waxay ahaayeen lamaane qorsheynayay inay aqal-galaan dhawaan.
Nin lagu magacaabo Elias Rodriguez, oo 30 jir ah kuna dhashay magaalada Chicago, ayaa lagu qabtay goobta dhacdada isagoo ku dhawaaqaya "Free Falastiin". Rodriguez waxaa lagu eedeeyay inuu xiriir la lahaa ururka bidixda fog ee "Party for Socialism and Liberation" wuxuuna ka qayb galay mudaharaadyo lagu taageeray Falastiin.
Madaxweynaha Mareykanka Donald Trump ayaa si degdeg ah u cambaareeyay weerarka, isagoo ku tilmaamay inuu yahay "argagixisnimo ka dhan ah Yuhuudda" oo aan la aqbali karin. Sidoo kale, Benjamin Netanyahu ayaa amray in la xoojiyo ammaanka safaaradaha Israa’iil ee caalamka.
Hay’adaha ammaanka ee Mareykanka, oo ay ku jiraan FBI-da iyo booliska Washington, D.C., ayaa bilaabay baaritaan wadajir ah oo ku saabsan dhacdadan. Waxaa la sheegay in weerarku uu yahay mid si gaar ah loo beegsaday, iyadoo la tixgelinayo xiriirka u dhexeeya weeraryahanka iyo taageerada uu u muujiyay Falastiin.
Weerarkan ayaa ku soo beegmay xilli ay sii kordhayo xasuuqa Falastiiniyiinta Gaza, taasoo keentay in la xoojiyo ammaanka goobaha muhiimka ah ee Yuhuudda iyo diblomaasiyiinta Israa’iil ee gudaha Mareykanka. Dhacdadan ayaa sidoo kale muujineysa halista sii kordhaysa ee ka dhanka ah Yuhuudda ee dalka Mareykanka.
Dhinaca kale, dhacdadan ayaa xusuusinaysa weerarkii hore ee ka dhacay Madxafka Xusuusta Holocaust ee Washington, D.C., bishii Juun 2009, halkaasoo James Wenneker von Brunn uu ku dilay sarkaal amni oo madow ah.
GAROWE ONLINE
