Aadan Madoobe oo la kulmaya tijaabo adag: Daciifnimada hoggaankiisa oo Baydhabo ka muuqata

BAYDHABO — Maamulka Koonfur Galbeed ayaa wajahaya xaalad amni oo sii cakirmaysa tan iyo markii Aadan Maxamed Nuur (Aadan Madoobe) uu hoggaanka maamulka kala wareegay bartamihii Juun 2026, iyadoo magaalada Baydhabo ay mar kale ka dhaceen weerarro iyo iska horimaadyo u dhexeeya ciidamo iska soo horjeeda.

Baydhabo ayaa bilihii u dambeeyay noqotay goob ay isku hayaan dhinacyo kala duwan, xilli ciidamada dowladda Federaalka iyo kuwa taageersan maamulka Aadan Madoobe ay ku sugnaayeen magaalada iyo nawaaxigeeda. Ciidamo lagu soo daadiyay duleedka magaalada ayaa lagu sheegay inay qayb ka yihiin dadaallada lagu adkeynayo ammaanka iyo ka hortagga weerarro cusub.

Si kastaba, ciidamada taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen, ayaa maanta gudaha u galay magaalada, iyagoo la wareegay qaar ka mid ah xaafadaha Baydhabo. Dhaqdhaqaaqa ciidamada ayaa sababay cabsi iyo walaac hor leh oo soo food saaray dadka shacabka ah, iyadoo xaaladda magaalada ay weli tahay mid kacsan.

Weerarka maanta ayaa u muuqda inuu la mid yahay weerarro hore uga dhacay Baydhabo, kuwaas oo muujiyay in ciidamada ku sugan duleedka magaalada aysan si buuxda uga hortagi karin dhaq-dhaqaaqa ciidamada kasoo horjeeda maamulka hadda jira. Iska horimaadyada ayaa sidoo kale muujiyay kala qeybsanaanta siyaasadeed iyo tan amni ee ka jirta Koonfur Galbeed.

Aadan Madoobe, oo taageero ka helaya dowladda Federaalka, ayaa tan iyo markii uu xilka qabtay wajahaya caqabado waaweyn oo ku saabsan xasilinta maamulka iyo mideynta ciidamada. Dowladda Federaalka ayaa sheegtay in isbeddellada siyaasadeed ee Koonfur Galbeed ay muhiim u yihiin xoojinta dowladnimada, balse mucaaradka ayaa ku eedeeyay Muqdisho inay faragelin ku hayso arrimaha maamulka.

Dhanka kale, Laftagareen iyo taageerayaashiisa ayaa ku adkeysanaya in isbeddelka hoggaanka Koonfur Galbeed uu yahay mid aan sharciyad ku fadhiyin, iyagoo dalbanaya in xal siyaasadeed laga gaaro khilaafka jira. Taasi waxay sii adkeynaysaa dadaallada lagu doonayo in Baydhabo looga dhigo meel amni ahaan deggan.

Xaaladda maanta ka taagan Baydhabo ayaa mar kale muujisay sida uu u jilicsan yahay amniga magaalada iyo sida khilaafka siyaasadeed uu ugu milmay arrimaha ciidamada. Haddii aan si degdeg ah loo helin xal siyaasadeed, waxaa laga cabsi qabaa in iska horimaadyadu ay sii bataan, taas oo halis gelin karta shacabka iyo dadaallada lagu xasilinayo Koonfur Galbeed.

Mas'uuliyiinta maamulka Koonfur Galbeed iyo dowladda Federaalka ayaan weli si faahfaahsan uga hadlin xaaladda ugu dambeysay ee magaalada, halka dadka deegaanka ay sheegayaan in xiisaddu ay weli ka jirto qaybo ka mid ah Baydhabo.

GAROWE ONLINE