7 qof oo ku geeriyootay dagaal ka dhacay Gedo
-
- Posted On 27-08-2016, 09:03PM
GARBAHAAREY, Somalia- Wararka ka imaanaya deegaanka Surriyo oo katirsan degmada Buurdhuubo ee gobolka Gedo ayaa sheegaya in halkaasi ka dhacay dagaal kharaar oo dhexmaray ciidamada dowladda Somalia, AMISOM iyo ururka Al Shabaab.
Dagaalkaasi oo la isu adeegsaday hubka noocyadiisa kala duwan ayaa sababay dhimashada 7 ruux oo katirsan labada dhinac iyo dhaawac 15 kale.
Iska hor imaadka labada dhinac ayaa socday muddo saacado ah, wuxuuna bilowday kadib markii ciidamada huwanta ah weerar ku qaateen fariisin halkaasi ku lahaayeen ururka Al Shabaab.
Saraakiil katirsan laamaha ammaanka ayaa ku waramay in xaaladdu dagantahay iminka islamarkaana waxay guulo ka sheegteen dagaalkii maanta iyagoo xusay inay la wareegeen gacan ku haynta tuulada Surriyo.
Majirto ilaa hadda wax war ah oo kasoo baxay dhinaca Al Shabaab, balse xiriiro aan la samaynay dadka deegaanka waxay noo xaqiijiyeen in dagaalku muddo socday iyagoo sheegay inaysan ogaan karin khasaaraha rasmiga ah ee labada dhinac kala gaaray.
Maalmihii ugu dambeeyay waxaa goobta lagu dagallamay isku aruursanayay mallayshiyaad katirsan Al Shabaab kuwaasoo kasoo carray dagaallo Todobaadkii hore ka dhacay gobolka Gedo ee Somalia.
GAROWEONLINE
