Abdimalik Jones oo Muqdisho la keenay
-
- Posted On 09-12-2015, 01:09PM
December 9, 2015 (GO)- Sarkaal ka tirsanaa Al-shabaab oo labo maalmood kahor isu soo dhiibay ciidamada Dowladda Federaalka ee Baraawe ku sugan ayaa maanta oo Arbaco ah lasoo gaarsiiyey magaalada Muqdisho.
Ninkan oo lagu magacaabo Abdimalik Jones islamarkaana ah Maraykanka madow, wuxuu Al-shabaab isaga baxay kadib markii isaga iyo koox uu ku jiro oo taageero u muujiyey Daacish loogu hanjabay in la dili doono.
Hay'adda Sirdoonka iyo Nabadsugidda Qaranaka ayaa la wareegtay Jones. Warar aan sugneyn ayaa tibaaxaya in ninkaas lagu wareejin doono dowladda Marayakanka.
Dhowrkii bilood ee u dambeeyey waxaa soo shaac baxay khilaaf u dhexeeya hoggaanka sare ee Al-shabab, khilaafka ayaa ka dhashay ka go'aan gaarista in Al-shabaab ku biirto Daacish iyo inay kasii mid ahaato Al-qacida.
Xubno ajnebi u badan oo taageersan fikirka ah in lagu biiro Daacish ayaa ka goostay Al-shabab, waxayna taasi keentay in dagaallo kooxda dhexdeeda ahi ka dhacaan gobolka Jubbada Dhexe.
GAROWE ONLINE
