Al-Shabaab oo ciidamo ku dishay Shabeellada Hoose
-
- Posted On 18-09-2015, 01:23PM
18 September, 2015(GO)-Wararka ka imaanaya gobolka Shabeellada Hoose ayaa sheegaya in ururka Al-shabaab dileen Sagaal askari oo ka tirsan ciidmada dowladda Somalia.
Dilka ayaa yimi ka dib weerar Al-Shabaab ku qaadeen saldhig ciidamadu ku leeyihiin deegaanka Yaaq-bariweyne oo ku yaalla gobolka Shabellaha Hoose.
Weerarka ayaa dhacay Saaka oo Jimca ahayd sida Garowe Online u xaqiijiyeen goob joogayaal ku sugan halka dagaalku ka dhacay.
Gudoomiye ku-xigeenka gobolka Shabeellada Hoose Cali Nuur ayaa VOA-da u sheegay in Shabaab qabsadeen saldhigga ciidamada ee Yaaqbariweyne, isla markaana heysteen muddo kooban.
Waxa uu Cali Nuur intaas ku daray in ciidamadu dib ula wareegeen saldhigga.
Sida ay sheegayaan dadka deegaanka, ururka Al-Shabaab ayaa gubay hal gaari iyagoo kaxaystay laba kale.
Dhinaca kale warka ka soo baxay Al-Shabaab ayaa lagu sheegay inay dileen 13 askari oo ciidamada dowladda Somalia ka tirsan.
Shabaab ayaa waayadan dib u qabsanayay deegaanno hore looga saaray oo ku yaalla Shabellada Hoose.
Ururka Al-Shabaab ayaa gacanta ku dhigay deegaanka Jannaale ka dib markii ciidamada Midowga Afrika isaga baxeen.
GAROWEONLINE
