Axmed Macallin Fiqi oo u sharaxan maamulka gobollada dhexe
-
- Posted On 22-12-2014, 04:26AM
December 21, 2014 (GO)- Xili uu jiro khilaaf ka dhashay dhismaha maamulka gobollada dhexe ee Soomaaliya ayaa waxaa soo kordheysa tirada musharixiinta u taagan xilka madaxweynaha ee maamulkaas.
Taliyihii hore ee nabad sugidda Soomaaliya Axmed Macalin Fiqi oo maanta u waramay Radio Garowe ayaa sheegay inuu yahay musharax u taagan xilka madaxtinimada maamulka gobolada dhexe.
Ujeedada uu isu soo sharaxay wuxuu ku sheegay inay tahay maadaama uu yahay nin waayo aragnimo iyo aqoon ku filan u leh maamulka iyo siyaasadda ayna ka go'an tahay in gobollaa dhexe la horumariyo.
Mar wax laga waydiiyay hadii xilkan uu ku guuleysto waxyaabaha uu qaban doono, wuxuu sheegay inuu xoogga saari doono sugidda amaanka, la dagaalanka Al-shabaab, dib u heshiisiinta beelaha gobolka iyo kobcinta kaabeyaasha dhaqaalaha.
Madaxweynaha Maamulka Galmudug Cabdi Xasan Caawale Qaybdiid ayaa horay u shaaciyey inuu yahay murashax u taagan xilka madaxweynaha maamulka gobollada dhexe.
GAROWE ONLINE
