Axmed Madoobe iyo Shariif Xasan oo Muqdishu lagu dhex-dhexaadiyay
-
- Posted On 09-01-2016, 01:20PM
09 January, 2016(GO)-Kulan uu garwadeen kayahay Ra'isal wasaaraha dowladda Federalka Somalia Cabdirashiid Cali Sharmake ayaa maanta ka dhacay magalada Muqdishu gaar ahaan garoonka diyaaradaha Aadan Cadde.
Ujeedka shirka saddex geesoodka ah ayaa lagu sheegay in lagu xallinayo madmadoow cusub oo kala dhexgalay Madaxweynaha Koonfur Galbeed Shariif Xasan Sheekh Aadan iyo Madaxweynaha Jubbaland Axmed Madoobe.
Labada hogaamiye ayaa shaki soo kala dhexgalay kadib markii dhawaan degmada Ceelbarde looga dhawaaqay maamulka Bakool Sare, waxaana Shariif Xasan ku eedeeyay Jubbaland inay taageerayso maamulkaas.
Arrintaas ayaa sababtay in madaxweynaha Koonfur Galbeed kabiyo diido shirka wadatashiga habraaca doorashada Somalia ee 10 bishan ka dhici doonta magalada Kismayo.
Cumar Cabdirashiid ayaa hogaamiyaasha is-khilaafsan isu keenay waxuuna ku qanciyay in la dhameeyo wixii kala aragti duwanaan ah, isagoo Shariif Xasan ku qanciyay tagista Kismayo.
Kulankan kadib ayaa madaxda labada maamul sheegeen inay diyaar u yihiin wadahadal, waxaana Axmed Madoobe tilmaamay inuu Baydhabo u tagi doono sidii shacabka looga qancin lahaa waxyaabaha la isla dhexmarayo, halka Shariif Xasan uu codsaday in dowladda dadajiso xallinta khilaafka labada dhinac.
Ra'isal wasaaraha Somalia ayaa dhankiisa sheegay in shirka madashada ee loo ballansanaa 10 bishan inuu furmo laga dhigi doono 11 January.
GAROWEONLINE
