Barlamanka oo kordhiyay Waqtiga dhismaha xukuumadda Jubbaland
-
- Posted On 01-09-2015, 07:52PM
1 September, 2015(GO)-Baarlamaanka Jubbaland ayaa maanta ka dooday codsi uga yimi madaxweynaha maamulkaasi oo ku aadan so dhisidda golaha xukuumadda Jubbaland.
Kalfadhiga maanta oo ay soo xaadirey 59 mudane ayaa 55 ka mid ahi waxay ogolaadeen in Axmed Madoobe la siiyo 60 maalmood oo dheeri ah si uu u soo magacabo golaha wasiirada maamulka Jubbaland, Saddex waa diinteen, waxaa ka aamusay hal mudane.
Xildhibaanada ayaa sidoo kale ka dooday wax ka badal lagu sameeyo dastuurka maamulkaasi qodobkiisa khuseeya waqtiga lagu soo magacaabayo golaha wasiirada, waxayna isku af-garteen in wax laga badalo.
Madaxweynaha maamulka Jubbaland Axmed Maxamed Islaam ayaa haystay 21 cisho oo ka bilaabanaysay xilliga loo dhaariyay xilkaasi, balse waxa uu codsaday in waqti loogu daro maadaama ay jiraan duruufo aan u saamaxaynin, waxaana maanta loogu darey 60 maalmood oo ka bilaabanaysa 5 bishan aan ku jirno ee September.
Dhanka kale waxaa la qorsheynayaa in dhawaan Kismayo lagu qabto Caleema saarka Axmed Madoobe maadaama loo doortay Madaxweynaha Jubbaland markii labaad.
GAROWEONLINE
