Bomb lagu weeraray ciidamo katirsan dowladda Soomaliya
-
- Posted On 19-06-2016, 01:29PM
MUQDISHU, Somalia- Weerar loo adeegsaday bomb gacmeed ayaa maanta lagu weeraray ciidamo katirsan dowladda Soomaaliya oo ku sugnaa suuqa Bakaaraha, waxaana soo gaaray dhawacyo kala duwan sida ay noo xaqiijiyeen goob joogayaal ku sugnaa halka weerarku ka dhacay.
Ilaa saddex askari ayaa dhaawacmay iyo ruux shacab ah oo watay Mooto kaasi oo ka agdhawaa halka ciidamadu joogeen.
Bamb-kan, waxaa tuuray dhalinyaro la sheegay inay katirsanyihiin ururka Al Shabaab, kuwaasi oo goobta ka baxsaday.
Ciidamada la weeraray ayaa qaraxa kadib furay rasaas inkastoo aysan jirin cid ku waxyeelloowday.
Dhinaca kale wasaaradda Amniga Gudaha dowladda Soomaaliya, ayaa sheegtay inay fashiliyeen weerar la la doonayay in loo adeegsado Mooto.
Afhayeenka wasaaradda Amniga Gudaha, Cabdimaalik Macallin oo warbaahinta kula hadalayay magaalada Muqdishu, ayaa sheegay in Mootadaan ku qaraxday Meel ku dhow Xero Jarmal, uuna ku dhintay Ruuxii waday oo uu sheegay inuu ka tirsanaa Al-shabaab kuwaasi oo dagaal kula jira Dowladda Somalia iyo Ciidamada AMISOM.
“Ciidamada Amnigu waxay goobtii uu qaraxu ka dhacay ka billaabeen Baaritaanno ay ku ogaanayaan halka lagu soo diyaariyay,” Ayuu yiri Cabdimalik Macallin.
Weerarada Al Shabaab ee magaalada Muqdishu ayaa xoogaystay intii lagu jiray bisha barakaysan ee Ramadaan.
GAROWEONLINE
