Ciidamada DF iyo mileeshiyaadka Ahlu Suna oo dagaalmay
-
- Posted On 13-12-2014, 06:21AM
December 13, 2014 (GO)- Dagaal ayaa aroornimadii hore ee saaka ku dhex maray koonfurta degmada Dhuuso Mareeb ciidamo ka tirsan kuwa Dowladda Federaalka iyo mileeshiyaad taabacsan Ururka Ahlu Sunna Waljamaacah.
Faah faahin dheeri ah lagama hayo khasaaraha labada dhinac kasoo gaarey iska hor imaadkaas oo sida lagu soo waramayo muddo labo saac ku dhow socdey.
Dagaalka saaka ka dhacay duleedka xarunta gobolka Galguduud ee Dhuuso Mareeb wuxuu xiriir la leeyahay dagaal kale oo shalay gelinkii dambe ka dhacay degmada Guriceel.
Iska hor imaadka Guriceel oo ugu yaraan hal qof ku dhintay shan kalena ku dhaawacmeen, wuxuu biloway kadib markii mileeshiyaad ka tirsan Ahlu Sunna ay jidka u galeen wafdi ka socda Dowladda Federaalka oo muddooyinkii u dambeeyey gobolka ku sugnaa.
Ahlu Sunna ayaa dhowaan maamullo cusub usoo magacawday degmooyinka Dhuuso Mareeb iyo Guriceel halkaasoo ay horay uga jireen maamullo Dowladda Federaalka hoos taga, waana taas sababta loo malaynayo in khilaafka gacan ka hadalka dhaliyey uu salka ku hayo.
Todobaadyadii u dambeeyey waxaa gobolka Galguduud ka soconayey dadaallo ku aadan sidii loo dedejin lahaa dhismaha maamulka gobollada dhexe ee ka koobnaan doona Galguduud iyo koonfurta gobolka Mudug.
GAROWE ONLINE
