Ciidamada Ethiopia oo ka baxey degmada Tayeeglow, Al Shabaab oo la wareegtey
-
- Posted On 26-10-2016, 10:45AM
TIYEEGLOW, Somalia -Al Shabaab ayaa saakay dib ula wareegay degmada Tiyeeglow ee gobolka Bakool, kadib markii ay ciidamada Ethiopia faaruqiyeen saldhigyadooda military habeenimadii xalay.
Ciidamada Ethiopia ayaa sidoo kale waxaa u qorsheysan inay ka baxaan dhowr degmo oo kale sida , Waajid, Ceelbuur iyo Baardheere, oo kuwasoo ku yaala gobolada Bakool, Galgaduud iyo Gedo.
Wararka ayaa sheegaya in boqolaal Askari oo Soomaali ah, oo ku sugnaa degmada Tiyeeglow markii ciidamada Ethiopia ka guureen saldhig-yadooda, iyaguna ka baxeen degmada.
Ciidamada Ethiopia ee ka baxay Tiyeeglow ayaa gaarey degmada Xudur, ee xarunta gobolka Bakool.Degmada Tayeegloow ayaa gacanta dowladda ku jirtay mudo ku dhaw Labo sanadood.
Dadka deegaanka ayaa aad walaac uga muujiyay soo dib ugu soo noqoshada degmada ee Kooxda Al shabaab kuwasoo inta badan dilal u geysta shacabka markii ay magaalo dib ula wareegaan.
Dhinaca kal saraakiisha ciidamada dowladda iyo tababarayaal ajnabi oo ku sugnaa Tiyeeglow iyo Waajid ayaa lagu soo qaadey Diyaarado Helicopters ah oo dhanka Baydhobo keeney.
Bixitaanka ciidamada Ethiopia ee degmooyinkaan ayaa ku soo beegmeysa xilli dalka Somalia dhowaan galayo doorashooyin.
GAROWEONLINE
