Ciidamada Somaliya oo sheegey in saraakiil ajnabi ah dileen
-
- Posted On 04-05-2016, 10:59AM
MUQDISHO, Somalia- Taliska ciidamada xoogga dalka Somaliya ayaa sheegey weerar qorsheysan oo ciidanka Kumaandooska ka sameeyeen gobolka Shabeelaha hoose ku dileen saraakiil ajaanib ah kuwasoo kuwasoo Ka tirsanaa ururka Daacish.
Warsaxafdeed kasoo baxey taliska ciidamada Somaliya ayaa lagu sheegey in dagaal lagu qaadey xarun kooxdaani daganeyd ku dileen 12 sarkaal oo isugu jira Somali iyo Ajaanib.
“Ciidamada oo ku gudajira howlgallada joogtada ah ayaa weerar la qorsheeyay ku qaaday mucaskar ay tababar ku qaadanayeen koox ka tirsan Daacish, halkaasna lagu dilay 12 ka tirsan kooxdaasi oo isugu jira Somali iyo Ajaanib kadib markii ay iskacaabin kala hor yimaadeen ciidamada howlgalka sameynayey." Sidaas waxaa lagu sheegey qoraalka kasoo baxey Taliska ciidamada Somaliya.
Ururka Daacish oo ka dagaalama wadamada Suuriya iyo Ciraaq ayaa dhowaan kooxo Ka falaagoobey ururka Al Shabab waxay xarumo Ka sameysteen degaano ka tirsan koonfurta Somaliya iyo Puntland.
Kooxdaani ayaa dhowaan sheegatey in weerarkeedii ugu horeeyey ku qaadey ciidamo ka tirsan AMISOM iyo Somaliya kuwasoo marayey jidka u dhexeeya Muqdisho iyo Afgooye.
GAROWEONLINE
