Ciidankii Sierra Leone ee Kismaayo ku sugnaa oo la sagootiyey
-
- Posted On 18-12-2014, 02:00PM
December 18, 2014 (GO)- Magaalada Kismaayo waxaa maanta lagu qabtay munaasabad lagu sagootinayey cutub ka tirsan mileteriga dalka Sierra Leone islamarkaana qayb ka ahaa hawlgalka nabad ilaalinta Midowga Afrika ee AMISOM.
Munaasabadda waxaa kasoo qayb galay mas'uuliyiin ay kamid ahaayeen Madaxweynaha Soomaaliya Xasan Sheekh Maxamuud iyo Madaxweynaha Jubland Axmed Maxamed Islaan.
Labada mas'uul ayaa dowladda Sierra Leone uga mahadcelisey taageerada ay u fidisay Soomaaliya iyagoo sheegay in abaalkaas dadka Soomaaliyeed marna illaawi doonin.
Qorshaha dib loogu celiyey ciidamada ka socda Sierra Leone waa mid ay dhowaan ku heshiiyeen Midowga Afrika, Sierra Leone iyo Somalia.
Warar hoose oo waarbaahintu heleyso ayaa sheegay in sababta ciidanka Sierra Leone loo qaadayaa tahay kadib markii la waayey askar lagu bedelo kuwii horay Soomaaliya u joogey cabsi laga qabo cudurka Ebola dartiis.
GAROWE ONLINE
