Duleedka degmada Buuhoodle oo lagu dagaalamay
-
- Posted On 17-02-2015, 01:57PM
February 17, 2015 (GO)- Ciidamada Somaliland iyo mileeshiyo beeleed ayaa maanta ku dagaalamay tuulada Horufadhi oo qiyaastii 50km degmada Buuhoodle dhanka galbeedka kaga beegan.
Dagaalka oo bilowdey kadib markii ciidamada Somaliland weerar kedis ah kusoo qaadeen tuulada Horufadhi, waxaa ku dhaawacmay labo qof oo labada dhinac ka kala tirsanaa.
Wararka ayaa intaas ku daraya in ciidamada Somaliland ee duulaanka soo qaadey ku raad joogeen mas'uuliyiin ka tirsan maamulka Khaatumo oo halkaas booqasho ku marayey.
Xaaladda ayaa caawa degen balse waxaa jirta saan saan colaadeed iyo abaabul ciidan oo labada dhinac ay wadeen.
Laga soo bilabo sanadkii 2011, deegaanka Horufadhi iyo dhulka miyiga ah ee ku hareeraysan waxaa ka dhacay dagaalo galaaftay nolosha tobanaan qof oo rayid u badnaa.
GAROWE ONLINE
