Doon ka baxsatey Ceel-huur
-
- Posted On 28-08-2015, 03:32PM
28 August, 2015 (GO)-Doon laga leeyahay dalka Iran ayaa lagu soo waramayaa inay ka baxsatey gacanta Burcad-Badeed Somali ah oo ku sugnaa deegaanka Ceel-huur oo ka tirsan degmada Hobyo ee gobolka Mudug.
Wararka ayaa sheegaya inay shalay doontani baxsatey, waxaana saarnaa Afar qof oo Somalia ah iyo 16 bad-maax u dhashay dalka Iran.
Si rasmi ah looma oga qaabka doonidu u baxsatay, balse warar ayaa sheegaya in badmaaxiintu ay ka xoog bateen 4 burcad-badeed doonidaasi haystay.
Cabdullahi Maxamuud oo ku sugan Hobyo ayaa idaacadda VOA-da u xaqiijiyay dhacdadan, waxaana uu tilmaamey in doontan ay ka mid ahayd 2 doonyood oo laga lee yahay dalka Iran iyo dad gaarayey 36 qof oo gacanta ugu jiray burcad badeedda Somali ah.
GAROWEONLINE
