Dowladda Federaalka oo ka hadashay khasaaraha weerarka
-
- Posted On 14-04-2015, 03:59PM
April 14, 2015 (GO)- Dowladda ayaa ka hadashay weerarkii Al-shabaab maanta kusoo qaaddey dhismaha ay magaalada Muqdisho ka deggen yihiin Wasaaradaha Waxbarashada iyo Batroolka ee Dowladda Federaalka.
Af-hayeen u hadlay Wasaaradda Arrimaha Gudaha iyo Amniga Qaranka ayaa sheegay in weerarkaas ay ku dhinteen shan iyo toban qof oo lix kamid ahi yihiin kuwii weerarka soo qaadey islamarkaana labaatan qof oo kale ku dhaawacmeen.
Af-hayeenku wuxuu sidoo kale sheegay in la badbaadiyey dhammaan shaqaalihii wasaaradaha ciidamaduna si xooggan isaga difaaceen dableyda.
Xilligii weerarku dhacayey waxaa xarunta ka socdey shir, waxaana ku sugnaa mas'uuliyiin uu kamid yahay wasiiru-dowlaha waxbarashada Cabdullahi Bile Nuur.
Weerarka gelinkii hore ee maanta magaalada Muqdisho ka dhacay ayaa ahaa kii labaad ee noociisa ah ee bil gudaheed isla Muqdisho ka dhaca, wuxuuna kusoo aadaya labo todobaad kadib markii Al-shabaab weerartey Jaamacadda Gaarisa ee dalka Kenya.
GAROWE ONLINE
