Faah faahin qaraxa Lafoole, degmada Afgooye [Sawirro]
-
- Posted On 30-06-2016, 12:28PM
MUQDISHU, Somalia- Faah faahin dheeraad ah ayaa kasoo baxaysa qarax saaka waabarigii lala eegtay gaari nooca dadweynaha qaada oo kusii jeeday degmada Afgooye gobolka Shabeellaha hoose oo magaalada Muqdishu 30KM u jirta.
Baskan, waxaa ku qaraxday miino dhulka oo ah nooca meesha fog laga hago, waxaana goobta la dhigayay marayay gaari ay saaranyihiin ciidamo katirsan dowladda Soomaaliya.
Wararka soo baxaya ayaa sheegaya in baska qarxay uu dhaafayay gaariga ciidanka waday, waxaana loo malaynayaa in weerarkaasi loogu talo galay ciidamada.
Nuur Axmed, oo wade ka ah mid kamid ah gawaarida dadweynaha ee isticmaala waddaas ayaa wakaalada Reuters u sheegay in gaariga miinada lala eegtay uu dhaafayay gaari kale oo ay ciidan saran yihiin, hase yeeshee kii askarta ay la soctay uusan waxba soo gaarin.
Sawirro laga soo qaaday goobta qaraxu ka dhacay ayaa muujinaya bur-bur xooggan oo soo gaaray gaarigii rakaabka waday, iyadoo la sheegayo in dhammaan dadkii la socday ay dhammaantood geeriyoodeen islamarkaana jirkoodu aad u googo'ay iyadoo aan lakala garankarin wajiyadooda.
Tirada dhimashada ayaa khilaf kasoo baxayaa waxaana wararka qaybtiis sheegayaan inay dhinteen 20 ruux, halka kuwo kale tilmaamayaan 18 qof.
Majirto cid ilaa hadda sheegatay mas'uuliyadda weerarkaasi.
GAROWEONLINE
