Hoobiyaal lagu weeraray Saldhiga AMISOM ee Xalane

Muqdisho:

MUQDISHO, Somalia- Weerar Hoobiyaal loo adeegsaday ayaa Maanta oo Khamiis ah Barqadii lagu qaadey Xarunta Xalane, oo ah Saldhigga ugu wayn ee ciidamada Midowga Africa ee AMISOM kuleeyihiin caasumadda dalka.

Sida Sarkaal katirsan ciidamada Booliska Somalia, oo ku sugan Garoonka Diyaaradaha ee Muqdisho, uu GO u xaqiijiyay Saddex Hoobiye ayaa ku dhacday nawaaxiga Irida laga galo Saldhigga AMISOM ee Xalane.

Wuxuu sheegay Sarkaalka in Hoobiyaasha ay cabsi xooggan ku abuureen dadka deggan Hareeraha Garoonka Diyaaradaha Muqdisho, oo kaabiga ku hayo Saldhiga Xalane, ee la weeraray.

"Waxay ahaayeen 4 Hoobiye, saddex waxay u gudbeen dhanka Xalane, midna wuxuu ku dhacay Xaafada Danwadaagta oo Hal Qof oo Dumar ah ayuuna ku dhaawacay," Ayuu yiri Qof deggan agagaarka Xalane.

AMISOM kama aysan hadlin Weerarka Hoobiyaasha ah ee lagu weeraray Xaruuntooda Xalane. Ma jirto Cid sheegatay Mas'uuliyada Madaafiicda, balse waxay qeyb ka yihiin Weerarada ka dhacaya Muqdisho.

Labo Maalmooda kahor, tiro Hoobiyaal ah ayaa ku dhacay Xaafadda 15-May, oo ku dhaw Qasriga Madaxtooyada Somalia ee Muqdisho, waxaana ku dhintay Dad Shacab ah oo aan waxba galabsan.

GAROWEONLINE