Kenya oo dishay madaxii qaraxyada Al-Shabaab
-
- Posted On 20-02-2016, 01:25PM
Afhayeen u hadlay Millateriga Kenya, ayaa sheegay inay dileen madaxii Al-Shabaab u qaabilsanaa qaraxyada Maalim Shariif iyo 20 katirsan kooxda, kadib weerar ciidamada AMISOM Jimcihii 19 Febrayo, 2016 ku qaadeen gobolka Gedo. David Obonyo, ayaa sheegay in weerarka lala bartilmaameedsaday xarun tababar oo Shabaab ku lahayd gobolkaas.
“Bartilmaameedka, waxa uu ahaa Maalim Shariif oo kooxda u qaabilsan farsamada qaraxyada gobolka Gedo, waxa uuna mas’uul ka ahaa dhacdooyin badan oo kooxdu ay ka geysatay Gobolka iyo meelo ka baxsan,” ayuu yiri Obonyo.
Kenya ayaa sheegtay in Intii uu socday howllgalkaasi baxsadeen qaar ka tirsan Kooxda iyaga oo dhaawac ah, hase ahaatee ka qabsadeen Hub ay ka mid yihiin 16 AK47 iyo 7 ARPG.
Sheegashada dilka Sarkaalkaasi, ayaa kusoo beegmay xilli dhawaan Kenya cadaysay inay dileen madaxii sirdoolka Al-Shabaab, Mahad Karataay, waloow ururka uu katirsanaa beeniyeen.
GAROWEONLINE
