Khasaare ka dhashay dagaal ka dhacay Caabudwaaq
-
- Posted On 08-09-2015, 02:15PM
08 September, 2015(GO)-Wasiirka Ganacsiga maamulka Galmudug ayaa lagu weeraray guri uu kaga sugnaa magalada Caabudwaaq ee gobolka Galgaduud, waxaana ka dhashay khasaare isugu jira dhimasho iyo dhaawac.
Ilaa hadda macadda khasaaraha rasmiga ah ee weerarka, balse wararka soo gaaraya Garowe Online ayaa sheegaya in ugu yaraan ay ku dhinteen Saddex ruux halka ay ku dhaawacmeen illaa 7 qof.
Arrintan ayaa timi ka dib markii uu xalay magalada Caabudwaaq tagay wasiirka Ganacsiga Galmudug Cabdiladiif Cabdullaahi Warsame.
Xaaladda Caabudwaaq ayaa haatan dagan waxaana ammaanka magalada gacanta ku haya ciidamo ka amar qaata maamulka Ahlusunna sida uu sheegay Maxamuud Warsame oo sheegtay inuu yahay madaxweyne ku xigeenka mamulka Ahlu Sunna Wal Jamaaca.
Dhanka kale Wasiirka Ganacsiga Galmudug ayaa isna sheegay in amniga magalada gacanta ku hayaan odoyaasha dhaqanka degmadaasi.
Weerarka wasiirka Ganacsiga Galmudug ayaa yimi ka dib markii maamulka Galmudug uu bishii la soo dhaafay xabsiga u taxaabay madaxweyne ku xigeenka Ahlusunna, waxaa labada dhinac u dhaxaysa xasarad siyaasadeed oo ku aaddan dhismaha maamulka gobolada dhexe oo Ahlusunna sheegayso inaysan aqoonsanayn.
GAROWEONLINE
