Madaxweynaha Somalia oo cambaareeyey weerarkii Central Hotel
-
- Posted On 20-02-2015, 02:00PM
February 20, 2015 (GO)- Madaxweynaha Dowlada Federaalka Xasan Sheekh Maxamuud ayaa cambaareeyey weerradii is-miidaaminta ahaa ee maanta Al-shabab la beegsatay Central Hotel oo ku yaal bartamaha magaalada Muqdisho.
Madaxweynaha ayaa ku tilmaamay weerarkaas fal waxashnimo ah kaasoo aan wax dib-u-dhac ah ku keeni doonin shaqada dowladda. Madaxweynuhu wuxuu sidoo kale tacsi u direy ehelada dadkii weerarkaas ku geeriyoodey isagoo kuwa dhaawacmeyna u rajeeyey caafimaad deg deg ah.
"aad baan uga xumahay in kooxaha nabadda ka soo horjeeda ay mar kale dad Muslimiin ah oo waajibka salaadda Jimcaha gudanaya ay ku weerareen masjid hoteelka Central ku dhex yaalla. Ilaahay ha u naxariisto inta ku dhimatey, kuwa ku dhaawacmeyna waxaan Ilaah uga baryayaa inuu degdeg caafimaad buuxa u siiyo" ayuu yiri.
Isagoo hadalkiisa sii wata wuxuu sheegay in ciidamada dowladda iyo kuwa AMISOM joojin doonin dagaalka ka dhanka ah Al-shabaab.
"Ciidammadeena amniga oo kaashanaya ciidammada nabad ilaalinta Midowga Afrika (AMISOM), iyo shacabka marnaba joojin maayaan dagaalka kooxahaasi ka dhanka ah, ilamaa Soomaaliya ay nabad buuxda ka hesho"
Ugu yaraan labaatan qof ayaa ku geeriyootey ku dhowaad soddon kalena way ku dhaawacmeen labo qarax oo maanta ka dhacay hoteelka Central ee magaalada Muqdisho.
GAROWE ONLINE
