Madaxweyne Galmudug oo eedeeyay gudoomiyaha Barlamanka Somalia
-
- Posted On 07-01-2016, 08:56PM
07 January, 2016(GO)-Madaxweynaha maamulka Galmudug Cabdikariim Xusen Guleed ayaa ka hadlay safarka gudoomiyaha Barlamanka Somalia ku tagay degmada Dhuusamareeb ee xarunta gobolka Galgaduud.
Guleed ayaa sheegay in Maxamed Sheekh Cusmaan Jawaari degmadaasi kawado carqaladaynta maamulka Galmudug iyo dadaalada ay wadaan xukuumadda Somalia ee lagu soo afjarayo khilaafka kala dhaxeeya Ahlusunna.
Madaxweynaha Galmudug oo hadalkan jeediyay xilli uu warbaahinta kula hadlay Cadaado ayaa tilmaamay in arrintani saamayn ku yeelan karto madasha wadatashiga doorashada Somalia ee 10 bisha lafilayo inay ka dhacdo Kismayo.
Hadalka Guleed ayaa kusoo beegmay xilli Afhayeenka Barlamanka Somalia degmadaasi maanta u tagay howlo la xiriira dhammaynta khilaafka mudada kala aloosan labada maamul ee ka dhisan gobollada dhexe, waxaana ku wehelinaya 25 mudane oo golaha shacabka Somalia katirsan.
Gudoomiye Jawaari eedaynta uga timi Cabdikariim Xusen Guleed wali kama hadlin.
GAROWEONLINE
