Maraykanka oo cambaareeyey weerarkii hoteelka Muqdisho
-
- Posted On 20-02-2015, 04:09PM
February 20, 2015 (GO)- Dowladda Maraykanka ayaa cambaareysey weerarkii is-miidaaminta ahaa ee maanta Al-shabab la beegsatay hotelka Central ee magaalada Muqdisho.
Qoraal kasoo baxay xafiiska wakiilka gaarka ah ee Dowladda Maraykanka u qaabilsan Somalia James P. McAnulty ayaa lagu cambaareeyey weerarka islamarkaana tacsi loogu direy ehelada dadkii weerarkaas ku waxyeeloobey.
Qoraalka waxaa sidoo kale lagu sheegay in Dowladda Maraykanku si dhow ula sii shaqeyn doonto madaxda Dowladda Somalia, ciidamada Somalia iyo ciidamada AMISOM; si ay uga adkaadaan Al-shabab.
"weerarkani wuxuu tusaale u yahay sida ay Al-shabaab halis ugu tahay dhammaan Soomaalida. Dowladda Maraykanku waxay sii wadi doontaa inay si dhow ula shaqeyso madaxda Soomaaliya, ciidamada dowladda Soomaaliya iyo AMISOM si looga adkaado Al-shabaab" qoraalka ayaa sidaas lagu yiri.
Sidan si lamid ah waxaa weerarkaas u cambaareeyey Madaxweynaha Dowlada Federaalka Soomaaliya Xasan Sheekh Maxamuud.
Ugu yaraan toban qof ayaa ku geeriyootey ku dhowaad labaatan kalena way ku dhaawacmeen labo qarax oo maanta ka dhacay hoteelka Central ee magaalada Muqdisho.
Dadka dhintey iyo kuwa dhaawaca ah waxaa ku jira mas'uuliyiin dowladda ka tirsan iyo qaar horay xilal kala duwan uga soo qabtey.
GAROWE ONLINE
