Ninkii dilay taliyihii NISA Shabeellaha dhexe oo la qabtay
-
- Posted On 22-06-2016, 02:43PM
Maamulka gobolka Shabeellaha dhexe, ayaa gacanta kusoo dhigay gacan ku dhiiglihii ka dambeeyay dilkii shalay loo gaystay AHN taliyihii ciidamada nabadsugidda gobolkaasi Cabdiwali Ibraahim oo uu dilay nin katirsanaa ciidanka.
Ciidamada amniga ayaa maanta gacanta kusoo dhigay, isagoo ku dhuumalaysanaya nawaaxiga degmada Jowhar, waxaana la dulgeeyay maydka taliyaha oo waqtigaasi lagu tukanayay salaadda Janaasada.
Maamulka gobolka, ayaa ka hadlay soo qabashada dambiilahaasi, waxayna tilmaameen inay dhawaan cadaaladda horgayn doonaan, iyagoo sidoo kale tilmaamay inay baaritaan ku samayn doonaan arrimo kale oo la xiriira sababta uu dilka u gaystay iyo inuu horay uga tirsanaa kooxda Al Shabaab.
Gudoomiye ku xigeenka gobolka Shabeelaha Dhexe Axmed Meyre Makaraan, oo la hadlayay mid kamid ah Idaacadaha Muqdishu, ayaa sheegay in ninkan lasoo qabtay xilli lagu howlanaa aaska marxuumka, sidaasi awgeed laga gaari waayay in baaritaan iyo su'aalo badan la weydiiyo.
Dilka taliyaha ayaa imaanaya xilli la sheegay in dhalinyaro badan oo kasoo laabatay kooxda Al Shabaab lagu daro ciidamka NISA.
GAROWEONLINE
