Odoyaasha Hiiraan oo maamul gooni ah ku dhawaaqay
-
- Posted On 21-07-2016, 12:03PM
BALADWEYNE, Hiiraan- Odoyaasha ku dhaqan gobolka Hiiraan ayaa shaaciyay inay samaysanayaan maamul gooni ah iyagoo gaashaanka ku dhuftay dadaallada ay waddaan urur goboleedka IGAD, waxayna ku xireen shuruud adag.
Afhayeenka Duubabka Dhaqanka Gobolka Hiiraan Ugaas Cali Ugaas Muxumed Ugaas Shafeec oo warbaahinta la hadlay ayaa sheegay inay is-fahmi waayeen wakiilka IGAD ee Somalia, Maxamed Cabdi Afey, isagoo intaasi raaciyay inay wadaan dadaallo ay ku samaysanayaa maamul u gooni ah.
Shafeec ayaa tilmaamay inaysan cidna wax ku darsan karin ilaa laga fuliyo shuruudda ay ku xireen IGAD oo ah in ugu yaraan gobolkooda loo qaybiyo Labo ama saddex hadii kale ay ka madax banaanaan doonaan qorshaha Shabeellaha dhexe ee shirka gogoshiisu taallo Jowhar.
''Waxaan rabaa inaan maanta halka uga dhawaaqo Anniga oo ku hadlaya Afka duubabka dhaqanka, in munaasabada saarka Ugaas Xassan kadib gobolka Hiiraan yeellan doono Dowlad-gobolleed dhameystiran,'' Ayuu yiri Ugaas Cali.
Odoyaasha ayaa fariin u diray IGAD oo ka codsaday inaysan kharakh iyo waqti isag lumin dadka reer Hiiraan hadii aysan dalabkooda u fulin.
Arrinta ayuu sheegay inay qorshaheedu billaaban doono Caano Shubka Ugaas Xasan Ugaas Khaliif Ugaas Rooble.
IGAD ayaa dowladda Somalia u xil saartay dhismaha maamulka labadaasi gobol kadib markii dowladda Federalka ku fashilanta yaqleelidda maamul ay yeeshaan Hiiraan iyo Shabeellaha dhexe.
GAROWEONLINE
