Qaraxyo ka dhacay Muqdishu
-
- Posted On 09-03-2016, 10:48AM
MUQDISHU- Labo qarax oo kala duwan ayaa saaka ka dhacay magalada Muqdishu xarunta Somalia, waxaana inta la hubo dhintay Afar kamid ah ciidamada Boliiska iyadoo dhaawacmeen shacab badan oo ka cunteenayay maqaaxi ku taalla degmada Cabdul-casiis ee gobolka Banaadir.
Qaraxyada mid kamid ah ayaa loo adeegsaday gaari Surf ah halka kan kale uu ahaa Bajaaj.
Weerarka koowaad ayaa ka dhacay degmada Cabdul-casiis, waxaana lala eegtay goob maqaaxi ah oo ku sugnaayeen ciidamo Boliis katirsan, waxaan halkaasi ku dhintey afar ciidamadaas Boliiska degmada ah iyadoo jiraan dhaawacyo badan oo goobaha caafimaadka loo qaaday.
Qarax kale ayaa isna ka dhacay degmada Waabari ee gobolkaasi, waxaana la sheegay inuusan jirin khasaaro ka dhashay iyadoo laamaha ammaanku tilmaameen inay fashiliyeen isku daygaas.
Taliyaha qaybta Boliiska gobolka Banaadir Gen. Cali Xirsi Cali "Gaab", ayaa weeraradan ka hadlay wuxuuna sheegay inay qabteen wadihii gaariga Surf-ka ahaa ee ku qarxay afaafka xarunta gaadiidka Boliiska degmada Cabdul-casiis, isagoo tilmaamay inay dhinteen qaar kamid ah ciidamadii goobta ku sugnaa.
Cali Gaab, ayaa sidoo kale xusay inay fashiliyeen qarax Bajaaj ama Dhug-dhugley lagu fulin lahaa, wuxuuna cadeeyay in la qabtay raggii saarnaa ka hor intaysan qarxin.
Qaraxyadan, ayaa yimi xilli lakala qaybiyay ammaanka gobolka oo loo kala xilsaaray Boliiska iyo Nabad sugidda, waxaana asbuucii hore Muqdishu ka dhacay kulamo kala duwan oo looga xaajoonayay ammaanka caasumadda Somalia, balse ma muuqato in la hakiyay weerarada ururka Al-Shabaab.
GAROWEONLINE
