RW Somalia oo cambaareyay weerarka Jannaale
-
- Posted On 01-09-2015, 08:19PM
1 September, 2015(GO)-Ra’iisal Wasaaraha Xukuumada Federaalka Somalia Cumar Cabdirashiid Cali Sharmarke ayaa si kulul u cambaareeyey weerarkii lagu qaaday xero ay deganaayeen ciidamo ka tirsan kuwa Nabad illaalinta ee AMISOM, kuna taala degmada Jannaale ee gobolka Shabeelada hoose.
“Waxaan cambaareyneynaa weerarka kooxaha nabad diidku ay ku qaadeen ciidamada nabad illaalinta ee AMISOM, waxaana tacsi u dirayaa qoysaskii ay ka baxeen ciidamada naftood hurayaasha ah” ayuu yiri Ra’iisal wasaaraha Somalia
Sharmake ayaa sidoo kale tacsi u diray dowladda Uganda ee ay ka socdeen ciidankaasi naftooda ku waayay difaaca iyo xasilinta Somalia.
“Qorshaheenu waa in dalka laga sifeeyo haraadiga kooxahaasi caadeystay daadinta dhiiga ummada, waana muhiimada koowaad ee Xukuumadeyda sidii looga ciribtiri lahaa goobaha yar ee ay weli ku harsan yihiin”.
Ma ahan weerarkii ugu horeysay ee lala eegto ciidamo ka tirsan kuwa nabad ilaalinta u jooga Somalia ee AMISOM.
GAROWEONLINE
