Shariif Xasan oo loo doortey Madaxweynaha Koonfur Galbeed
-
- Posted On 17-11-2014, 01:41PM
Isniin, Nov 17, 2014 [ GO]- Gudoomiyihii hore ee Barlamannka DKMG ah ee Somalia ayaa loo doortey Madaxweynaha maamulka loogu magacdarey Koonfur Galbeed, kadib markii Afartii musharax ee la tartameysay tanaasushey.
Musharaxiinta tanaasushey wareegii koowaad iyo labaad ayaa Hoolka doorshada ka sheegtey iney Shariif Xasan xilkaan uga tanaasuleen madaama uu ka bixi karo islamarkaana khibrad lagu hogaamiyo maamulkaan cusub leeyahay.
Ergada ka kooban 396 ayaa doorasho gacan taag ah ku dooratey xubnihii tartamayey, 373 kamid ah ayaa Madaxweynaha cusub ee maamulka Koonfur Galbeed dooratey , 15 kamid ah ayaa diidey halka 8 kalena ka aamustey.
Madaxweynaha cusub maamulka KG ayaa isla-madasha doorashada lagu dhaariyey iyadoo wararka ka imaanaya tibaaxayaan Baydhabo inuu u duulayo is-galabta magaalada Nairobi halkaasoo ka sii aadi doono dalka Denmark.
Gudoomiyaha Barlamanka Federaalka ayaa warsaxafdeed u soo saarey saaka ku diidey natiijada doorashadaan isagoo xusey in dowlada aysan aqoonsan doonin.
Madaxweynaha cusub ayaa waxaa sidoo kale horyaala caqabado badan sida xubnaha maamulka Lixda gobol kuwasoo diidan maamulka Sadexda Gobol.
Maamulka Koonfur Galbeed ayaa ka kooban Sadexda gobol ee Shabeeblaha hoose, Bay iyo Bakool.
GAROWEONLINE
