Somalia: Ciidanka oo deegaano cusub la wareegay
-
- Posted On 05-05-2016, 04:09PM
JOWHAR- Ciidamada dowladda Somalia oo hogaamiyaan saraakiil sar sare ayaa maanta u suuro gashay inay dib ula wareegaan deegaano ay faarujiyeen markii kooxda Shabaab weerar ku qaaday saldhigooda Ruun-Nirgood gobolka Shabeellaha Dhexe.
Deegaanada ilaa hadda gacanta lagu dhigay oo lagu kala magacaabo; Maxaa-saciid, Nuur Dugle, Cad-cadey, Cadaan-laxey iyo Wargaadhi.
Wax dagaal ah kama dhicin meelaha ciidamadu la wareegeen, waxaana socda howlgallo looga soo horjeedo kooxda Shabaab.
Dhinaca kale waxaa iyaguna dhaq-dhaqaayo ciidan ka wada nawaaxiga deegaanka Ruun-Nirgood mallayshiyaad katirsan kooxda Shabaab, waxaana lagusoo waramayaa in ciidamada dowladdu ku wajahyihiin deegaankaasi oo sabtidii lagu qabsaday dagaal xooggan.
Ciidamo xooggan ayaa gobolka lasoo gaarsiiyay, waxaana dowladdu sheegtay inay gobolka kasaari doonaan Shabaab iyagoo kaashanaya AMISOM.
Dagaalladan ayaa saameeyay dadka shacabka ah, waxaana lagu barakacay goobo badan oo kamid ah gobolkaasi, halka kuwa kale lagu soo sheegayo go'doon.
GAROWEONLINE
