Somalia: Dowladda oo Cadaysay Shilka Daalo
-
- Posted On 06-02-2016, 09:59PM
MUQDISHU-Xukuumadda Somalia ayaa iclaamisay natiijo hordhac ah oo ku saabsan shilka diyaaradda Daalo, kadib shir jaraa'id oo ku qabtay Muqdishu, wasiirka Gaadiidka iyo Duulista Hawada Somalia, Cali Axmed Jaamac "Jangali".
Jangeli, ayaa sheegay in waxa ka dhacay diyaaradda ahaayeen qarax si ula-kac ah loo geliyay, isagoo tilmaamay in ciidamada ammaanka Somalia falkaas usoo qabteen dad lagu tuhmayo inay ku lug lahaayeen Bambaano uu xusay inay diyaaradda ku qaraxday.
Wasiirka ayaa cadeeyay in baritaanka shilkaas gacan ka geysteen khubaro Somalia iyo ajnabi isug jirta, gaar ahaan wuxuu xusay inay taageereen sirdoonka dalka Maraykanka. Wuxuu sheegay inuu socdo baritaanku, isagoo ka gaabsaday inuu faah-faahsho tirada dadka la xiray iyo qaabka diyaaradda looga galiyay bamka.
Arrintan, ayaa soo baxday xilli horay tuhun looga muujiyay shilka diyaaradda Daalo inay ku lug leeyihiin ururka Al-Shabaab, waxaana Talaadadii lasoo dhaafay 02 bisha Febraayo, shil soo wajahay diyaaradda oo ku jirtay safar ay ugu socotay dalka Jabuti, iyadoo ka duushay Muqdishu, waxaana saarnaa in kabadan 70 ruux.
GAROWEONLINE
